喙焦

喙焦

老爸 kā 囡仔囥上眠床, 關燈轉家己房間睏.

"Pă," 囡仔醒來: "我喙焦, 予我一杯水, 好無?"

"緊睏, 我已經關燈欲睏 ah."

過一睏, 囡仔 koh 叫: "Pă, 我欲啉水."

老爸真煩: "莫吵 lah, 你 koh 吵, 我會過去 kā 你拍."

Koh 過一睏, 囡仔 koh 叫:

"Pă, 你緊來 kă 拍, 來 ê 時, 順紲扎一杯水予我, 好無?"

--

Chhùi-ta

Lāu-pē kā gín-á khǹg chiūⁿ bîn-chhn̂g, koaiⁿ-teng tńg ka-tī pâng-keng khùn.

"Pă," gín-á chhéⁿ--lâi: "Góa chhùi-ta, hō͘ góa chi̍t-poe chúi, hó bô?"

"Kín khùn, góa í-keng koaiⁿ-teng boeh khùn ah."

Kòe chi̍t-khùn, gín-á koh kiò: "Pă, góa boeh lim-chúi."

Lāu-pē chin hoân: "Mài chhá lah, lí koh chhá, góa ē kòe-khì kā lí phah."

Koh kòe chi̍t-khùn, gín-á koh kiò:

"Pă, lí kín lâi kă phah, lâi ê sî, sūn-sòa chah chi̍t-poe chúi hō͘--góa, hó bô?"